Ollu cuigemat ja evttohusat – RSS vuordá čuovvuleami

Bearjadaga 13.1.2012 lei Romssa Sámi Searvi ovttas máŋgga eará servviin nd. gulahallančoahkkimis Romssa suohkaniin. Suohkana bealis oassálasttiiga sátnejođiheaddji Jens Johan Hjort ja gávpotráđđi Jonas Eilertsen. Ulbmilin lei gávdnat oktasaš bálgá mo nannet ja ovddidit diliid sámegiela ja kultuvrra hárrái. Čoahkkima vuoigŋa lei positiivvalaš, ja buohkat orro háliideame geahččat ovddos guvlui.
Čoahkkimis, mii bisttii njeallje diimmu, ledje eanáš servviid ovddasteaddjit jienas. Maiddái sámepolitihkkárat geavahedje valjit čoahkkináiggi. Sátnejođiheaddji ja gávpotráđđi eanáš dušše guldaleigga ja čáliiga notáhtaid, eaba álgán digáštallat evttohusaid.

Oasseváldit bukte ollu árvalusaid doaibmabijuide. RSS evttohii ee. ásahit bargojoavkku sámiide guoskevaš doaimmaid guorahallamii. Dán evttohusa anii gávpotráđđi Eilertsen lunddolažžan.

RSS oaivvilda ahte bargojoavku galggašii maiddái heivehit diibmá hábmejuvvon sámegiela ja kultuvrra doaibmaplána otná beaivve diliide. Gávdnojit maid boarrásat plánat Romssa suohkanii, ovdamearkka dihte jagis 1995, maidda berrešii huksejuvvot. Dán barggus galget erenoamážit mánát ja nuorat vuoruhuvvot.

Eará evttohusat ledje ee:

  • ásahit sámi viesu Romsii
  • čalmmustahttit sámegiela almmolaš arenain, omd. sámegielat šilttaiguin almmolaš viesuin
  • organiseret sámegieloahpahusa dainna lágiin, ahte ii čuozaše nu ollu eará fágaide
  • lágidit guottuidásaheaddji doaimmaid skuvllain
  • sámegielat dearvvasvuođadikšu mánáidgárde- ja skuvlamánáide
  • oahpaheddjiide skuvlejupmi Romssa guovllu sámi historjjás
  • sámi koordináhtor, geasa dárbbašettiin sáhttá váldit oktavuođa, ja gii maiddái sáhtášii geahččat suohkana ossodagaid doaimmaid ja fálaldagaid ollisvuohtan, ja maiddái ovttasbargat fylkkasuohkaniin ja earáiguin
  • ásahit neahttasiiddu mii muitala makkár sámi fálaldagat gávdnojit suohkanis

Loahppasániin dajaiga sihke sátnejođiheaddji ja gávpotráđđi iežaska oahppan ollu, ja sátnejođiheaddji lohpidii bovdet ođđa čoahkkimii guorahallat evttohusaid. RSS báhcá vuordit suohkana čuovvovaš lávkki.

 
Tromsø Sameforening - NSR
Adresse: Postboks 451
9255 Tromsø
Org. nr.: 981270215

Kontakt oss: post@tromsosameforening.no
 
© 2012 - Tromsø Sameforening - NSR
Webredaktør: Lene Antonsen